Galiza co Galego e Avoaescola teñen o pracer de convidalo/a a presentación da Avoaescola de Ferrolterra -un espazo educativo infantil en galego-, que terá lugar o vindeiro mércores día 8 de maio ás 19:30h no salón de actos da casa de cultura (Museo do humor) do Concello de Fene.
Agradecendo a súa presencia neste acto, así como a difusión do mesmo, reciba un cordial saúdo.
Avoaescola Ferrolterra
Avoaescola Ferrolterra é un espazo educativo en galego dedicado, nun primeiro momento, a nenos e nenas até os 6 anos. Iníciase coa finalidade de se transformar nunha escola infantil.
Avoaescola Ferrolterra realizará todas as accións, actividades lúdicas e educativas en lingua galega, co fin de que nenas e nenos acaden o seu uso nas relacións afectivas e de comunicación tanto sociais como familiares.
Esta educación liberadora e cooperativa centrarase na motivación e interese dos meniños e meniñas, respectando o ritmo e características de cada quen.
Será un espazo educativo inclusivo, laico, respectuoso e aberto á comunidade social do seu entorno.
As actividades faranse en contacto co medio natural e fomentarán a expresión artística como a música, a pintura ou o movemento. A aprendizaxe dos coñecementos será un proceso activo lúdico de construción e investigación, para as crianzas dende a creatividade e liberdade.
A educación en valores é clave para un desenvolvemento persoal axeitado. A tolerancia, a solidariedade, a empatía, a igualdade, as habilidades sociais ou a expresión de sentimentos serán elementos presentes no clima diario da Avoaescola.
O contacto con apego conformará unha relación baseada no afecto e na confianza.
Avoaescola de Ferrolterra goza dun lugar privilexiado ao lado do paseo marítimo, dun parque infantil e de amplas zonas verdes.
As propias instalacións contan con zona de xogo ao aire libre, espazos verdes e unha horta ecolóxica. Primará o concepto de funcionamento sostible, aprendendo sobre ciclos da natureza a través, por exemplo, da compostaxe e reciclado.
Avoaescola é unha cooperativa na que as propias familias asociadas teñen poder de decisión sobre as cuestións relacionadas co funcionamento e mantemento do espazo. Ademais participan co persoal educativo na xestión e dinámica educativa.
Avoaescola Ferrolterra abrirá as súas portas no vindeiro outono para comezar unha aventura chea de liberdade, convivencia e aprendizaxe!
Este proxecto está impulsado pola cooperativa (de ensino) Avoaescola, apoiada económica e socialmente pola Asociación Galiza co Galego, en colaboración coas Asociacións pedagóxicas Nova Escola Galega e Asociación Socio-Pedagóxica Galega, e a Asociación de Escritores e Escritoras en lingua Galega.
MÁIS INFO: avoaescolaferrolterra@gmail.com
FORMULARIO DE INSCRICIÓN: www.galizacogalego.com/avoaescola/inscricionferrolterra
—
Comisión Galiza co Galego
http://www.galizacocogalego.com
http://limiargalego.blogspot.com
Venezuela, 33, B, 15404, Ferrol, A Coruña
Telf: 629891145
